Работата на менаџерот за управување со човечки ресурси е да биде поддршка и на менаџментот и на вработените, и да биде линк, посредник, помеѓу нив на начин на кој и двете страни ќе бидат задоволни. Тоа не е нималку лесна работа затоа што никогаш не е однапред предвидлива, затоа што се работи со различни луѓе, кои се секој посебна индивидуа со свој посебен карактер и темперамент, со свој начин на однесување и реагирање, а дополнителна потешкотија се промените во внатрешната организација на фирмата и честите промени во законските регулативи.

Одделот за човечки ресурси има обврска да ги информира работниците за промените во компанијата и за новите мерки и закони кои се преземаат во врска со работата и работните односи, особено ако тие претставуваат закана за вработувањата. Во секој случај Менаџерот за управување со човечки ресурси мора да ги применува законските регулативи, и одредбите од колективните договори за да не ја доведе компанијата во неповолна ситуација и токму тој аспект од управувањето со човековиот капитал се обработува во овој курс на Академијата.

Во една организација мора да бидеме многу внимателни при вработувањето на луѓе. Ова е лесно да се каже, но треба многу работа и внимание за да се реализира. Постојат работи кои треба да се научат за да можеме соодветно да го реализираме процесот на регрутација и селекција на кадар и со тоа да имаме ефективно враќање на инвестициите.

Целта на сите нас е да ги имаме вистинските луѓе на вистински работни места во вистинско време. Курсот Регрутација и селекција е насочен кон процесите на регрутација и селекција во организацијата, како и на процесот по завршување на селекција и воведување на нововработениот во работата.

Сè што доведува до активност, ја насочува и го определува нејзиниот интензитет и времетраење се нарекува со заедничко име мотивација. Мотивацијата е плод на заедничката соработка на две научни дисциплини: менаџментот и психологијата.

Со менаџментот се навлегува длабоко во суштината на работењето и водењето на претпријатијата, а со психологијата се навлегува во тајната на човечкото однесување. Бидејќи претпријатијата се пред сé создадени, составени, водени и одржувани од луѓето, јасна е потребата да се разбере:

• Како луѓето функционираат?
• Зошто работат?
• Кои се нивните потреби?
• Што сакаат да постигнат во животот?
• Кои се нивните цели?
• Што ги мотивира?
• Како да бидат попродуктивни?
• Како да бидат иновативни и инвентивни?
• Како да го дадат својот максимум?
• Како да се надградуваат?
• Како да бидат најдобриот ресурс кој го има претпријатието?

Во овој курс ќе ги осознаете основните теории за мотивација на вработените и нивна примена во праксата.

Развојот на вработените е основа за задржување на талентите и остварување на професионален развој. Инвестицијата во вработените има голема улога во денешно време. Секој напор за постигнување на целите е голема предност пред конкуренцијата и го гради реномето на организацијата.

Развојот на вработени опфаќа работа со вработените на нивната кариера. Курсот за развој на вработени се фокусира на иновативни идеи и практики за развој и усовршување на вработените, како и за начин на поставување на „организација која учи”. Дел е посветен на обука на вработените, коучинг и менторство.

Теми на овој курс се:

• Анализа на потребите од развој на вработени
• Обука на вработени, коучинг и менторство
• Управување со таленти
• Управување со знаење
• Поставување на интерни програми за обука, како и интерни обучувачи
• Планирање на наследници на вработени (замена) во случај на отсуство или напуштање на работното место

Менаџерите изведуваат евалуација на работниот учинок со години. Вработените посетуваат обуки со години. Вработените во организациите со векови поминуваат долго време на работа. Процесите, како што се планирање, буџетирање, продажба, наплата со години се извршуваат во организациите. Но многу често овие активности се спроведуваат затоа што мора да се спроведуваат, а не заради тоа што тие директно придонесуваат за остварување на посакуваните резултати на организацијата.

Процесот на менаџирање на перформансот или работниот учинок нè потсетува дека не е исто да бидеш зафатен и да оствариш резултат. Овој курс се однесува на следењето на деловната ефикасност на вработените, што е една од најслабите точки во повеќето организации. Овој курс ќе обезбеди знаења за вистинско воспоставување на систем за следење на ефикасноста, споделување на најдобрите практики во поставувањето курс за управување со работна изведба и учинок, како да се дефинира моделот на компетенции, како и практичните процедури за имплементација во пракса.

Управувањето со ефикасноста има за цел брзо и ефикасно воспоставување на систем за да се добие поголема ефективност и да се спречи флуктуација на вработените.

Еден од предусловите за одговорно и посветено работење на вработените е финансиската надокнада за нивниот вложен труд. Основната плата е надокнада за секојдневното работење, а паричните награди-бонуси се исплаќаат на вработените во зависност од остварениот учинок. Бонусите се исплаќаат за ефективно остварени резултати и не се однесуваат на секојдневното работење за кое вработениот добива основна плата.

Од исклучителна важност е финансиската надокнада на вложениот труд биде прецизно и праведно одредена според позитивните норми и закони. Токму поради тоа, во овој курс ќе се запознаете со различните типови на плати и наградување на вработените. Дел е посветен на законските барања, структурите на плати, но се работи и на нефинансиско наградување.

Теми во овој курс се:

• Плата, придонеси и административни аспекти
• Системи за наградување на вработени
• Буџети за вработени
• Пресметување на поврат на инвестиција од обука
• HR аудит и HRIS

Ревизија на процесот за човечки ресурси претставува темелна анализа на процесот на управување со човечки ресурси со цел да се добие детална и структурирана слика за начинот на управување со човечките ресурси со јасни показатели за критичните точки. Овој курс нуди систематизирано знаење за тоа како да го анализираме квалитетот на управување со човечките ресурси, имплементирани во секој сектор во компанијата, проследено со работа на студии на случај од практиката.

Другиот дел се занимава со информациски системи за управување и развој на човечки ресурси, дефинирање на потреба, видови и избор на информациски системи за управување и развој на човечки ресурси.